Shiv Manas Puja – Shiv Stotra

शिव मानस पूजा – शिव स्तोत्र

रत्नैः कल्पितमासनं हिमजलैः
स्नानं च दिव्याम्बरं

नानारत्नविभूषितं मृगमदा
मोदाङ्कितं चन्दनम्।

जाती-चम्पक-बिल्व-पत्र-रचितं
पुष्पं च धूपं तथा

दीपं देव दयानिधे पशुपते
हृत्कल्पितं गृह्यताम्॥

सौवर्णे नवरत्न-खण्ड-रचिते
पात्रे घृतं पायसं

भक्ष्यं पञ्च-विधं पयो-दधि-युतं
रम्भाफलं पानकम्।

शाकानामयुतं जलं रुचिकरं
कर्पूर-खण्डोज्ज्वलं

ताम्बूलं मनसा मया विरचितं
भक्त्या प्रभो स्वीकुरु॥

छत्रं चामरयोर्युगं व्यजनकं
चादर्शकं निर्मलम्

वीणा-भेरि-मृदङ्ग-काहलकला
गीतं च नृत्यं तथा।

साष्टाङ्गं प्रणतिः स्तुतिर्बहुविधा
ह्येतत्समस्तं मया

संकल्पेन समर्पितं तव विभो
पूजां गृहाण प्रभो॥

आत्मा त्वं गिरिजा मतिः सहचराः
प्राणाः शरीरं गृहं

पूजा ते विषयोपभोग-रचना
निद्रा समाधि-स्थितिः।

सञ्चारः पदयोः प्रदक्षिणविधिः
स्तोत्राणि सर्वा गिरो

यद्यत्कर्म करोमि तत्तदखिलं
शम्भो तवाराधनम्॥

कर-चरण-कृतं वाक् कायजं कर्मजं वा
श्रवण-नयनजं वा मानसं वापराधम्।

विहितमविहितं वा सर्वमेतत्-क्षमस्व
जय जय करुणाब्धे श्री महादेव शम्भो॥

Ratnaih kalpitam-aasanam hima-jalaih
snaanam cha divya-ambaram

Naanaa-ratna-vibhushitam mrga-madaa
moda-angkitam chandanam

Jaati-champaka-bilva-patra-rachitam
pushpam cha dhoopam tathaa

Diipam deva daya-nidhe pashupate
hrt-kalpitam grhyataam

Sauvarne nava-ratna-khanda-rachite
paatre ghrtam paayasam

Bhakshyam pancha-vidham payo-dadhi-yutam
rambhaa-phalam paanakam

Shaakaanaam-ayutam jalam ruchikaram
karpoora-khanndojjvalam

Taambulam manasaa mayaa virachitam
bhaktyaa prabho sviikuru

Chatram chamarayor-yugam vyajanakam
cha-adarshakam nirmalam

Viina-bheri-mrdangga-kahala-kalaa
giitam cha nrtyam tathaa

Sashtaangam prannatih stutir-bahu-vidhaa
hye-tat-samastam mayaa

Sankalpen samarpitam tava vibho
pujaam grhaanna prabho

Aatmaa tvam girijaa matih sahacharaah
praannaah shariiram grham

Puujaa te vissayop-bhoga-rachana
nidraa samaadhi-sthitih

Sancharah padayoh pradakshin-vidhih
stotrani sarvaa giro

Yad-yat-karma karomi tat-tad-akhilam
shambho tava-araadhanam

Kara-charanna-krtam vaak
kaaya-jam karma-jam vaa

Shravanna-nayana-jam vaa
maanasam vaaparaadham

Vihitam-avihitam vaa
sarvam-etat-khsamasva

Jaya jaya karunna-abdhe
shri-Mahadeva Shambho